الاسم: خميس نصر 
فاضل إيه بس نبكي عليه ؟ شعر:خميس نصر
حصار الخوف هنقضي عليه
صبحنا في زمان التيه
غلبنا معاك يا إبن الإيه
فاضل إيه بس نبكي عليه ؟
آدي الأسعار بتكوينا
والينا موش سائل فينا
حاطط بؤسه وشقاه فينا
صفار البيضةبقى بجنيه
جهاز إعلام بيتباهى
بشلة تافهة بالعاها
وبالأزمات محاوطاها
بتلعب في دماغنا يا بيه
بنستورد أكم أشياء
تزود لينا في الأعباء
نظام فاشل مصاب بغباء
صحيح ولا انتو رأيكو إيه ؟
بيستورد فانوس م الصين
ويمضي كويز مع الملاعين
نظام عاجز ومخه تخين
قليل الحيلة قاعد ليه ؟
بتدي للعدو المحروق
رخيص وبنص سعر السوق
لو انت بتشرب المدعوق
قولولي الناس دى ذنبها إيه ؟
يبيعو غازنا للأندال
ده بكرة تلعن الأجيال
حكومة بفعلها البطال
تخلي الشعب مديون ليه ؟
آدي الشعب اللي سممتوه
بأمراض الخبيث صبتوه
برغم إن انتو عشمتوه
فاضل إيه بس يبكي عليه ؟
هيتحرك هيتحرك
عبيط برضه السكوت غرك
لمزبلة التاريخ جرك
فاضل إيه بس نبكي عليه ؟
كتبها خميس نصر في 11:15 مساءً ::
السلام عليكم
مدونة في غايه التميز والطرح الجريء
والاسلوب السهل الممتع
ارجو زياره مدونتي وابداء الرأي فيما كتب فيها
وشكرا
اخوك
نوفل
السعودية