الاسم: خميس نصر 
بقيت في الحب م الدراويش
غزل الموظفين
شعر/ خميس نصر
وحشتيني كتير خالص
وانا م الشوق مانيش خالص
لا فيه عضلات ولا مجانص
وآدي قلبي ضرب لخمة
بقالي زمان بناديكي
بدمع العين بناجيكي
هاسيب الدنيا وآجيكي
يارب تحل لي الأزمة
ماشي مادد ماحصلّكيش
فمن حبك ما تحرمينيش
بقيت في الحب م الدراويش
دابت في السكة ميت جزمة
أنا عاشق بيتعذّب
بطول الهجر متلهلب
وقلبك ليه بقى مخشّب
أنا بدونك مفيش عزمة
عيالي برضه تشتاق لك
كمان عقلي نسي شكلك
كفاية دلال على مهلك
بداء البعد متهمة
كرامتي خلاص آخر حاجة
وأعصابك في تلاجة
كفاية عند وسماجة
يا بنت العجل يا لحمة
كتبها خميس نصر في 08:15 صباحاً ::
لا يوجد تعليق